GALICIA LE: PLATAFORMA DE PRÉSTAMO DE LIBROS ELECTRÓNICOS BPG

eBiblio Galicia é o “Catálogo do libro electrónico en castelán” que, xunto co do libro electrónico en galego, forma parte do proxecto GaliciaLe, plataforma da Rede de Bibliotecas Públicas de Galicia que fai posible a lectura de libros electrónicos a través da internet.

Desde eBiblio podes tomar en préstamo as principais novidades editoriais en castelán en formato dixital para podelas ler en diferentes dispositivos: tabletas, teléfonos intelixentes, ordenadores persoais ou lectores de libros electrónicos.

Este catálogo do libro electrónico en castelán promoveuno o Ministerio de Educación, Cultura y Deporte coa colaboración da Xunta de Galicia e está xestionado por esta. O servizo está dispoñible no enderezo galicia.ebiblio.es. Tamén pode accederse aos libros prestados a través da app eBiblio Galicia, dispoñible para iOS e Android.

 Quen pode utilizar eBiblio?

Si xa es socio/a dunha das bibliotecas da Rede de Bibliotecas públicas de Galicia tan só precisas rexistrarte como novo usuario/a da plataforma de préstamo de libro electrónico GaliciaLe. Poderás facelo desde calquera ordenador sen necesidade de trasladarte á biblioteca.

No caso de que non sexas socio/a dunha das bibliotecas da Rede, deberás acudir a unha delas para obter o carné. Alí rexistrarante como novo usuario/a da plataforma de préstamo de libro electrónico GaliciaLe

Requisitos técnicos

Para poder ser usuario/a de eBiblio é preciso cumprir os seguintes requisitos:

• Dispoñer dun dispositivo compatible e de acceso a internet.
• Para os dispositivos móbiles, ter instalada a app eBiblio Galicia.

Que libros podo atopar en eBiblio?

eBiblio ofrécelle á cidadanía unha colección de novidades editoriais de todo tipo. De acordo coa clasificación que se utilizou para a selección e a adquisición das obras, existen libros electrónicos co seguinte contido:

• Ficción para público adulto, incluíndo narrativa, poesía e teatro.
• Obras xerais sobre ciencia e tecnoloxía, ciencias sociais, arte e humanidades.
• Obras xerais relacionadas con cuestións de saúde, autoaxuda e desenvolvemento persoal, formas e actividades relacionadas co ocio, viaxes, deportes e informática de interese xeral.
• Ficción orientada ao público infantil e xuvenil, incluíndo narrativa, poesía e teatro.
• Obras de non ficción para o público infantil e xuvenil, incluíndo todo tipo de materias (arte, música, historia, ciencia e tecnoloxía, ocio, deportes, etc.).
• Audiolibros narrados por profesionais e gravados en formato audio a partir da versión íntegra da obra escrita.

A quen podo dirixirme para obter máis información?

Na túa biblioteca poderán informarte con maior detalle sobre este servizo.